الرئيسية
ف كل المناسبات سواء نجاح او عيد ميلاد ... الخ نلاحظ ان كلمة مبروك او كل سنة وانتى طيبة او اى تهنئة زى دول دايما دايما تيجى كلمة " وعقبال ما نشوفك ف الكوشة " او " ان شاء الله اشوفك بفستان الفرح "
الكلام ده بقى بيتقال للبنت من سن 12 سنة تقريبا وانت طالع والبنت بقى ترد تقول " لسه بدرى يا طنط "
وطنطك طبعا مش هتسكت تروح ردة ف ساعتها تقولها " بدرى من عمرك يا حبيبتى ده انا كنت قدك وشايلة ابنى على ايدى "
بدرى مين يا حاجة البت لسه مادخلتش ثانوى وطبعا الكلام ده بيأثر على نفسية البنات ويخليهم يحسوا ان فعلا قطر الجواز هيفوتهم لو مالحقوش نفسهم " قال يعنى قطر عدل أوى "
البنت ساعتها هتحاول تاخد لقب مخطوبة او متزوجة بكل الطرق والكبارى كمان وتوافق على اى حد يتقدملها مهما كانت مواصفاته ومش مهم حتى التوافق الفكرى او المادى او العاطفى بينها وبينه المهم انها تتخطب وخلاص
وبنفس السرعة اللى هتاخد بيها اللقب ده هتاخد لقب تانى وهو لقب " مطلقة "
ياريت الناس تخف علينا شوية وكفاية ضغوط عن الجواز وسنينه
فى حاجات كتير اهم من الجواز نفكر فيها والجواز اصلا ف حد ذاته مش أملة يعنى ده هم ومسئولية مش اى حد يقدر عليها ولا اى سن ومش عشان البنت سنها زاد شوية ولسه مش مخطوبة يبقى دى حاجة تعيبها او تقلل من قيمتها بالعكس مفيش أنثى على وجه الارض غير مرغوب فيها ولو من راجل واحد بس لكن لما ربنا يأذنلها نصيبها هيجيلها وكله بأمر الله
